锦泉眼镜:畀街坊多一双慧眼

点击:1673  添加时间:2013-11-22 18:13:00

?

?

???? 锦泉眼镜,第一间门店由郭炳老师傅创立于1956年小北路,其前身系“联合眼镜水笔生产合作社”。1988年,由其徒弟何锦泉先生接管,正式更名为“锦泉眼镜”。锦泉眼镜系一间保留咗优秀嘅广州文化嘅老字号眼镜店,其诚信务实嘅精神、灵活嘅销售方式、独特嘅亲情式服务,令其从一间只有3平方米嘅小店发展到如今拥有13间分店。本次采访,记者揾到锦泉揸Fit人泉哥,听佢讲从跟师学艺到独立经营嘅故事。

?

?? ?德艺双馨,成就“眼镜大王”

??? 南都:锦泉嘅前身,系联合眼镜水笔生产合作社,据闻系由郭炳老师傅喺1956年创立嘅。喺当时嘅环境下,郭炳师傅点解会创业呢?

??? 何锦泉:郭炳喺开呢间铺之前,系喺一间国营合作社度做嘅。后来,佢觉得啲制度比较死板,冇咩自由,噉就自己出嚟,喺小北路口开咗间3平方米嘅铺头。郭老师傅嗰时都不过系廿几岁。而且当时度度都系国营,佢都好惊人话佢资本家,所以就将规模做得比较细,一个人做,铺面又整到比较简陋,连个名都改成“联合眼镜水笔生产合作社”。

??? 南都:喺你嘅眼镜博物馆入面,有好多旧时嘅古董眼镜,1950年代嘅眼镜,同清末民初、而家嘅眼镜相比有咩唔同?

?

??? 何锦泉:1950年代嘅眼镜系以圆形为主,特别系大圆,我哋叫做“梨形眼镜”。民初时候,就以细圆居多。而家嘅眼镜就以方形为主嘅。喺材质上,1950年代嘅眼镜主要系用赛绿珞,呢种胶质好猛火嘅,我学师嘅时候都烧过好多个。呢种材料好平,同以前用玳瑁、犀牛角、金属嚟做嘅眼镜架,已经系平好多,普通人都可以用。不过,平极都要十零蚊一副眼镜,按当时嘅收入水平,人均每个月得廿零三十蚊,就已经算贵口架啦。所以嗰时一副眼镜戴二十年都有嘅。而家好多人可能要五六副眼镜,因为眼镜系实用,亦都系时尚。

??? 南都:一间3平方米眼镜铺,郭炳老师傅系点样打出名堂嘅?

何锦泉:都系靠诚信。以前我哋间铺喺小北路转弯位嗰度,噉就唔系好似而家啲铺噉,有个窗口仔嘅。因为我系从朝头早做到夜晚,一日做十五六个钟头,所以习惯中午瞌一个钟左右。有一日可能眼瞓过头,本来两点钟开门,瞓多咗十分钟左右。突然间有人敲窗口嗰块木板,我成个咋醒,打开窗望出边,排队排咗有二十人,啲街坊两点钟就已经喺度等我。因为呢个转弯位冇遮冇挡,晒到咩噉嘅,我自己打开门窗睇到都好感动。

?

??? 严师出高徒,两代皆重情

??? 南都:你跟郭师傅学嘢嘅过程中,有冇啲印象深刻嘅故事?

??? 何锦泉:我系1986年入行嘅。嗰时细个,街坊问我:“你想唔想整眼镜啊?”噉我觉得,都好啊,反正嗰阵冇嘢做,之后就通过朋友介绍识老师傅,然后就去咗小北路嗰度跟佢学嘢.我初初去,嗰几个平方米嘅铺头容纳唔到我喺里面学艺,特登整咗个简陋嘅木箱摆喺铺头门口,用嚟耷钉、拧螺丝等等。由于我哋嗰个铺头西斜,基本上早上11点开始就一直晒到下昼口架喇。大热天时,师傅叫我坐喺嗰度,一喐就会话我。啲街坊行过见到我,会问:你非洲嚟口架?

??? 另外仲有一件事,我以前踩单车返工嘅,有一次爆咗胎,要去整。嗰阵时做学徒系冇钱嘅,水都买唔起,见到人哋地下有罐机油,就以为系茶攞嚟饮咗,饮完之后仲使得多钱,要去洗胃。嗰日想放弃口架喇,但系谂谂下都系唔好,惊老师傅唔知道我去咗边度。本来三点几嚟到,后来变咗六点几先至到,仲畀佢闹咗我一身。闹完之后,我都唔敢讲咩回事。后来讲畀佢知之后,佢见我咁坚持同认真,心入面都好感动。老师傅对我要求好严格,亦都好睇重我嘅为人,佢亦都想揾一个信得过嘅人嚟将手艺同铺头传承落去,所以喺我学咗三年左右之后,就交咗个铺头畀我。

??? 南都:1988年,郭炳老师傅正式将呢间3平方米嘅眼镜铺交畀你。当时有啲咩仪式?

? ??何锦泉:我准备接手嘅时候,我哋签咗份协议。呢份协议好罕有,嗰阵时佢交个铺畀我,唔系叫我畀几多钱佢,而系畀几多斤油、盐、糖噉样嘅。我记得嗰阵时结算为系1个月132蚊人民币,但系我个个月都畀180蚊佢。

??? 南都:锦泉提供亲情式嘅服务,有冇发生过一啲特别感人嘅事呢?

??? 何锦泉:我师傅嘅性格比较厚道,人哋嗌佢去食饭佢都唔去嘅,因为佢惊受咗人哋恩惠,唔好意思。我接手之后,待人接物嘅嘢,更加系有过之而无不及,更加亲民。因为噉,先至有咁多街坊,远一远都嚟帮衬我哋.例如,周姨系帮衬咗我哋50年嘅老熟客,而家成90岁喇,我哋叫佢“送鸡姨”。大概喺20年前,有一次,佢有副眼镜断咗只髀,周围揾人整都整唔到,后尾满头大汗噉嚟揾到我,话:“阿泉仔,你快啲拉我整返佢啦,等住用啊呢副眼镜。”我整返副眼镜之后,佢好感激,成日嚟探我。佢系客家人,经常有人攞啲鸡鹅鸭畀佢,佢自己都唔舍得食,就攞嚟畀我食,当我系自己人。佢攞到嚟,我唔要又唔好意思。但系铺头成地都搞到邋遢晒,后来啲员工诈帝噉同佢讲,话阿何生都唔系好钟意食口架咋。佢可能都知道整邋遢地下,跟住递日就劏好过嚟畀我,但系送到嚟我屋企嘅时候,都已经变质喇。佢知道之后,又将啲鸡鹅鸭雪好晒攞嚟!有时仲将佢乡下嘅伊面,一条条噉拎嚟送畀我,其实佢自己行动都已经好论尽口架喇,仲系成日拎住两条大伊面,拎住只鸡走过嚟,到而家都仲系噉嘅。呢啲就完全系亲人嗰种感觉。

?

?? ?字号老,思想唔老

??? 南都:你系几时开始有开分店嘅谂法?

??? 何锦泉:二十年前,有个朋友喺天河有间铺,佢嫌远,就问我去唔去开,去嘅话就畀我开。所以就畀我开,但系嗰阵时都唔叫做分店,未有噉嘅意识,1993年嗰时,当时天河仲系一片荒地。真正讲开分店,应该系10年前左右。有一日,我喺小北路间老铺睇档,有个客人就话:“阿泉,嘥咗佢啦日日踎喺呢度,以你嘅能力唔净止系开一间店口架。”佢呢句话提醒咗我。嗰时,广州嘅连锁眼镜店越嚟越多,但系我哋噉样嘅亲情式服务嘅经营模式好少有。所以就慢慢噉做落嚟,有啱嘅位置我就开,到而家开咗13间分店,都唔容易口架。喺眼镜行业里面,广州人做到好似我噉嘅规模,都好少口架喇。

??? 南都:点解锦泉作为全广东唯一一个眼镜老字号,可以喺咁激烈嘅市场竞争中,屹立不倒?

??? 何锦泉:以前做眼镜单纯靠经验同服务。而家就系靠设备,我哋而家拥有嘅最先进验光设备,连眼科医院都未必可以比得上。所以,都系要慢慢适应呢个社会嘅发展。字号老,经营思想唔能够老,服务理念更加唔能够老。我呢间铺嘅装修,估计唔系第一就第二口架喇,唔系话因为我字号老就一定要搞到好似老店噉.我做眼镜博物馆嘅其中一个原因,都系要做岭南特色。我呢间店古今结合,既有古董收藏,亦都有世界一线奢侈品牌嘅眼镜喺度。所以我觉得,眼镜行业咁激烈,平有平做,贵有贵做,关键都系适应时代发展,做好服务同定位。

??? 南都:喺唔同嘅眼镜消费层次中,锦泉嘅定位系点嘅呢?

??? 何锦泉:我哋嘅定位系中档,因为中档人群比较多啲,我哋又唔贵又唔平,一百几十蚊都有,贵嘅几千蚊又有。锦泉系广州人嘅眼镜店,广州人系好务实嘅,最紧要又平又靓,货真价实。

??? 南都:你头先讲到老字号虽老,但必须迎合时代发展。究竟老字号对一个城市有几重要?应该点样去做好佢?

??? 何锦泉:如果你本身字号又老,经营嘅思想又老,装修又老,货源又老,社会自然会淘汰你口架。因为时时刻刻喺度变,我哋自己都喺度变紧。我觉得,政府方面亦都需要畀老字号更多嘅支持。唔系话就噉畀“老字号一条街”嘅位置你去做,生又好,死又好,都唔理你。我要经营,就必须要有人气,所以将北京路嘅人气南北打通,非常有必要,政府能够做好事做到底就最好喇。我觉得一个城市,除咗高楼大厦,文化好紧要,老字号好有保留嘅必要。因为高楼大厦容易揾,周街都系,但系有历史、有文化嘅一啲古旧嘢,唔系咁易揾口架喇,拆一间少一间,噉人哋嚟到广州睇咩呢?呢个亦都系我喺锦泉做眼镜博物馆嘅原因。

?

??? 记者手记:一副眼镜,一世感情

??? 讲真嗰句,我系第一次喺采访过程中,遇到老顾客嚟探当家老板嘅情况。六十几岁嘅一个阿姨,自己行入嚟何锦泉嘅办公室,直接就同泉哥讲:“泉仔,得唔得闲啊?过嚟揾你倾下偈。”泉哥笑住同佢点头,话:“你喺出面坐阵先,一阵搞掂出嚟揾你。”

??? 同泉哥倾咗个几钟头,佢强调锦泉眼镜最大嘅特色,就系亲情式嘅服务,好有人情味。泉哥话,关于锦泉嘅故事,讲三日三夜都讲唔完。因为57年间,无数嘅广州街坊嚟过锦泉,都会有一个故事。泉哥系一个重情重义嘅人,从佢喺讲到一啲故事嘅时候,面上依然动容嘅表情,就能够睇得出,佢有一颗柔软嘅心———感动系佢讲得最多嘅词,老师傅嘅感动、街坊嘅感动、佢嘅感动、员工嘅感动。

??? 喺呢度,郭炳老师傅嘅手艺同厚道嘅为人,曾令一班街坊排队等喺3平方米嘅铺头仔出面。喺呢度,曾经全心全力噉为一个七十岁嘅阿姨整返佢嘅眼镜,令呢个老人二十年间始终记挂恩德,老迈摇曳仍时时带住新鲜鸡鹅嚟探望泉哥。喺呢度,街坊见到泉仔咁勤力,曾经特意一早去市场买猪润,煲猪润粥畀呢个年轻人食。喺呢度,曾经有过一个老顾客车祸离世,泉哥忍住悲伤,全力为佢修整好已经碎烂嘅眼镜,畀佢戴住熟悉嘅眼镜安心噉离开……每一位客人,泉哥都当佢哋系亲人噉样,同佢哋交流,为佢哋服务。重情重义,令客人亦都心系锦泉。每一个故事里面,都有浓浓嘅广式人情味。

??? 对于锦泉嘅经营,泉哥又显示出广州商人嗰种审时度势嘅灵活。坚持该坚持嘅,譬如话佢最睇重嘅亲情式服务;发展该发展嘅,譬如店铺嘅装修、货源嘅针对性、分店嘅拓展等等。喺咁激烈嘅眼镜行业竞争中,仍然能够屹立不倒,呢种广州商人嘅经营头脑,有关键性嘅作用。

??? 泉哥话,佢自己祖祖辈辈都系广州人,对广州嘅感情非常之深厚,作为老字号,亦都有传承同保护广州文化嘅自觉。所以,佢喺铺头搞咗个眼镜博物馆,将郭炳老师傅嘅遗物同自己嘅收藏,都攞出嚟展示。佢话,如果人哋嚟到广州,睇到嘅净系高楼大厦,有咩意思?嚟到锦泉,起码可以睇到一个城市文化嘅一面。

??? 采访结束嘅时候,啱好系中午。泉哥行出铺头,同每个员工讲,叫佢哋快啲去食饭先。总经理林总话,泉哥一直都好关心员工,所以好多员工都会挂住佢。我谂,呢个真系一个好似家庭噉嘅眼镜店,无论系老板同员工之间,定系同客人之间。

??? (来源:南方都市报;采写:南都特约记者冯璐赟;特别鸣谢:ag官方网|官方网站)

[ 打印本页] [ 关闭窗口]
版权所有(C)ag官方网|官方网站,保留所有权利 地址:广州市光复中路199号 邮政编码:510140
联系电话:020-81868993 传真:020-81308473 主办机构:ag官方网|官方网站 邮箱:lzhxh@163.com
 ag国际厅亚洲线路|官网? ?亚游登录器|平台