清心堂:一口甘凉茶,成世岭南人

点击:1666  添加时间:2013-12-20 18:15:00

?

清心堂凉茶,潮州名中医詹泰来于1906年始创,其济世情怀为岭南人嘅日常保健作出咗体贴嘅贡献。1957年,詹泰来嚟到广州,喺广州创立清心堂凉茶铺,从此专营凉茶。此后经历过数次营业中断,至1999年开始连锁经营,如日中天,将广东凉茶铺推广出去,自觉承担传承广东凉茶嘅责任。今次,记者采访到清心堂第三代传人詹高雄嘅女婿、现清心堂总经理胡彦明,听佢讲讲同凉茶有关嘅家族故事。

??

?从潮州到广州,开始打响名号

??? 南都:清心堂呢个字号比较特别,佢系1957年先喺广州开铺,但系文史资料显示,清心堂始创于1906年,点解会有咁样嘅出入?

??? 胡彦明:清心堂系1957年喺广州开设嘅,当时系喺河南嘅敦和乡。但系清心堂嘅创始人詹泰来,其实喺1906年就已经研制出清心堂嘅家族祖传凉茶秘方,佢系当时潮州有名嘅中医,呢个秘方一直延续到佢后来出到嚟广州开凉茶铺,一脉相承,所以清心堂嘅凉茶系百年祖传。

??? 南都:詹泰来系一个中医,屋企都系做药铺,点解后来会开专门嘅凉茶铺?呢个秘方又系点样嚟嘅呢?

??? 胡彦明:詹泰来当时仲系后生仔,佢父母开药材铺,两个人都系中医,可以讲系中医世家,佢自细就有呢方面嘅素养,加上听讲佢系比较有天赋嘅人,除咗一啲有针对性嘅药方,广东人比较普遍性嘅病症,同岭南水土有关嘅湿热、上火,佢就专门针对呢种共有嘅体质开咗通用嘅药方。一嚟方便一啲人嚟执药,仲有如果有啲人要去外地,亦都可以执定嚟傍身。一开头,都系以药铺嘅形式嚟专门同人睇症执药嘅。到1935年,先至专门做祛湿降火嘅药汤,慢慢就有咗凉茶铺呢个概念,特登煲好药畀一般有需要嘅人饮用,其实系经历咗十几年嘅演化过程。

??? 南都:呢个时期作为药铺,佢嘅凉茶同其他一啲凉茶有咩唔同嘅地方?

??? 胡彦明:嗰阵时都未有“凉茶”呢种概念。好似王老吉咁,1828年创立,但系佢嗰阵时都唔系叫凉茶。其实就系一个药方,有降火或者祛湿嘅功效,后来慢慢普及开,先至有咗“凉茶”呢个讲法。每个做凉茶嘅店铺或者药房,都有自己独有嘅药方。就好似,针对同一种去火症状,唔同嘅中医开出嚟嘅方子,都会唔同。当然,佢嘅功能都系一样嘅,只系药效有所唔同而已。我哋搭配出嚟嘅药材比例,喺申报国家物质文化遗产嘅时候,检测出嚟嘅效果系同一批申报嘅药方中相对有效成分比较高嘅。

??? 南都:清心茶系一种点样嘅凉茶?

胡彦明:清心茶就系一种类似癍痧嘅凉茶,主要都系清热解毒,因为广东人都系湿热居多,呢味茶就系针对返广东人嘅呢种体制特性。

?

??? 字号停歇,反躲过时代浩劫

??? 南都:清心堂嘅名气系点做起身嘅呢?

??? 胡彦明:其实清心堂嘅发展阶段,基本上分为三个阶段。第一个阶段就系喺潮州,当时仲叫“泰来药铺”,听讲詹泰来嗰时屋企比较有钱,又系比较乐善好施嘅人,医艺又高,好多时候有啲比较穷嘅人嚟揾佢睇症,佢都唔收钱口架。有文人题咗副对联,“清茶入口舒经络,心腑提神延寿年”。1957年,佢过嚟广州开凉茶铺嘅时候,就引用咗呢副对联句首两个字,取名“清心堂凉茶铺”。呢个时期开凉茶铺,就变成养家糊口。名气肯定同喺潮州时候差得远,我谂都只系一间普通凉茶铺。第三个阶段,真正发展起嚟系1999年以后嘅事。当时喺中大西门成立咗第一间连锁凉茶店,运用公司化运营同连锁经营嘅方式,呢个时候就变成专业意义上嘅凉茶铺,亦都开创咗清心堂历史上经营最好嘅时期。

??? 南都:詹泰来点解会喺1957年嘅时候从潮州嚟到广州?当时嘅社会环境唔系太好,清心堂嘅生意如何?

??? 胡彦明:因为佢本身医术好,而且周边都有潮州人,所以喺圈子内都系小有名气,但就肯定冇喺潮州影响咁大。佢系一个做学术嘅人,经常研究方子,自己做得开心。佢哋嗰代人唔似而家,就系谂住开间铺,可以经常研究下药方,然后整啲茶出嚟畀人饮,等人哋健健康康,冇病冇痛。

??? 南都:嚟到呢边,清心堂嘅规模同以前有咩唔同,佢嘅药方系咪完全传承以前嘅药方?

??? 胡彦明:以前嘅药方都有,但系随住佢嘅不断研究,多咗好多品种。至于规模,听讲以前喺潮州,房产比较大,药铺又大,嗰时因为时疫嘅问题,经常煮汤药畀人饮,生意唔错。嚟到广州之后,听老人家讲好似话屋企环境唔好,冇乜钱,想搞以前咁大嘅药铺,冇咁嘅实力,所以就开凉茶铺。佢嗰时都就嚟60岁喇,后来喺1968年就过咗身。当然佢过身唔一定系因为“文革”嘅原因,不过好多方子都唔见咗,就系得几张细细张嘅,夹住喺其他嘢入面,仲有几本书。到最后留低落嚟嘅得几个,而家已经好烂喇,再过几年可能要风化添喇。我哋当时申报国家物质文化遗产,只报咗两个,“降火王”同“感冒茶”。

??? 南都:1968年詹泰来病逝,对于清心堂嚟讲系咪一个好大嘅打击?

??? 胡彦明:1968年詹老先生病重,当时大家就已经冇心继续经营清心堂,嗰啲铜壶、药磨、牌匾等等嘅嘢,我哋都收晒返嚟,但系都唔系话特登保留落嚟嘅,只不过攞返嚟就放埋一边。但就因为咁,反而将一啲有历史价值嘅重要嘢保留咗落嚟,逃过咗“文革”时候对凉茶文化嘅毁灭性打击,听讲好多凉茶铺嘅招牌、铜壶等器具都畀人打烂晒。嗰个时期冇咩商业氛围,所以大家都冇将呢件事当成系乜嘢,加上嗰时屋企环境比较穷,冇点遭受到破坏。如果呢个时候,你有间铺头,仲要系传统行业,肯定畀人当做“资本主义尾巴”咁割冇咗口架喇。所以,詹老先生走咗之后,清心堂就歇业咗20年,但系对于文化传承嚟讲,都可以叫做系塞翁失马,焉知非福。

??? 南都:后来,1988年重开清心堂,原因又系咩呢?

胡彦明:嗰阵时因为社会开放咗,出于生计上嘅考虑,都要谂下做啲咩行当。另一方面,我岳父詹高雄自细受爸爸詹孟德(第二代传人)嘅耳濡目染,对中药方面都有啲研究,有祖辈嘅一啲文化传承。所以佢喺1985年前后,就开始考虑呢件事,1988年就喺原址敦和乡开返呢间凉茶铺,但系生意不温不火,算系以“前店后家”嘅方式维持生计。听我岳父讲,开咗一两年又停咗,可能有各种原因,都冇心经营呢件事。真正有所发展,系到1999年嘅中大西门清心堂第一家连锁店。

?

??? 捱成主人婆,挑起传承责任

??? 南都:点解会谂到以连锁店嘅方式延续清心堂呢个老字号?

??? 胡彦明:1994年,黄振龙开始喺广州发围,当时我岳父詹高雄受到启发,觉得连锁经营呢种形式有得做,同时因为慢慢将父辈留落嚟嘅药方揾返出嚟,所以就谂办法做返凉茶呢行。于是成立公司,1999年喺中大西门开咗第一间连锁店。后来又喺北京路开分店,北京路呢间比较特殊,2000年开嘅,2006年又收返,租咗畀婚纱影楼。最近搞老字号一条街,我哋被邀请进驻,咁我就拣返原本北京路店址嘅位置嚟延续清心堂。

??? 南都:有人话,粤语、粤菜、凉茶共同定义咗岭南人,你点睇呢个观点?

??? 胡彦明:呢个讲法有一定嘅道理。虽然我唔系广州人,但系喺广州生活咗咁多年,又系广州女婿,我对广州已经好有感情。我觉得粤语系古语言保留得最好嘅,而且广州人以讲粤语为荣,呢个同广州系改革开放前沿有关,粤语成为一种时髦,广州人对粤语嘅认同感特别强。而粤菜同凉茶都有一个共同点——— 养生。粤菜一个非常重要嘅部分,就系汤水,因为呢个地方湿热,凉茶亦都系同样功效。广州嘅食疗文化,除咗味道好之外,更重要嘅系代表咗呢个地方嘅文化,我系呢个地方嘅人,食嘢必须要清淡,因为容易上火。因为同样嘅气候,广州人亦必须饮凉茶。我做凉茶,就做咗呢两方面嘅延伸。一个系凉茶铺,我哋作为广东凉茶代表,用连锁经营嘅方式实现咗凉茶铺“走出去”嘅发展,喺华南地区嘅好多城市都有清心堂。其实凉茶都系汤,只不过一个系茶汤,一个系膳汤。所以我哋已经开始做一件事,开发一系列嘅广东汤料;将凉茶公司,变成健康产业公司。一方面,我坚持做凉茶铺,另一方面,我哋做冲剂、汤料、快消品。我觉得汤料同凉茶嘅养生文化系一脉相承嘅,我想从凉茶出发,延伸到汤料,呢啲都系广州食疗文化嘅重要部分。之后,我想将汤品店推广出去,呢个系凉茶铺嘅升级版。我更睇好呢样嘢,因为凉茶太苦喇。时下年轻人,上火嘅话,饮汤就可以解决,未必会饮凉茶。

??? 南都:大家都系水碗凉茶铺嘅形式起家嘅老字号,有啲走向饮料化嘅完全快消路线,而清心堂系用连锁经营嘅方式嚟延续传统凉茶铺,点解清心堂会咁样选择?

??? 胡彦明:其实我哋而家系复合型嘅发展。凉茶铺嘅发展有阶段性,2007年前后系一个飞跃发展期,大街小巷都系凉茶铺,一条街可能十几间,好疯狂。经历呢种疯狂之后,凉茶铺嘅经营成本不断上升,经营压力越嚟越大。我哋公司点解会选择凉茶铺呢种形式,系因为要将呢种原汁原味嘅凉茶文化继续保留。但系另一方面,我哋会做其他嘢。你可以唔要凉茶铺,选择一种更快、更彻底嘅饮料化销售方式。凉茶嘅出路,除咗转向饮料之外,一条系传统凉茶铺,一条系冲剂型凉茶。我哋选择嘅系一种复合型嘅发展方式。但系,随住不断变化嘅市场需求,我哋都推出一啲功能饮料。如果净系做凉茶,公司嘅经营压力会非常大,我谂其他凉茶公司都一样,呢几年系凉茶嘅转型期。一系你就要行复合型路线,一系你就要将产品价格做一定嘅提升。如果唔系,十年前嘅凉茶系咁卖,十年后仲系一样嘅价钱,冇可能冇压力口架。所以,我哋一方面都做一啲快销模式,全国药店都卖我哋嘅冲剂。另一方面,从凉茶养生升级为健康养生,通过广州嘅凉茶同靓汤,推广广东食疗文化。

??? 南都:清心堂作为一个老字号,从潮州泰来药铺到今日嘅广州连锁凉茶老字号,中间亦经历过经营嘅中断,传承落嚟嘅嘢系咩呢?

胡彦明:第一个,我觉得系古药方,经过时间积累,适合岭南人体质嘅药方;第二个,就系悬壶济世嘅情怀,呢种文化传承成为咗清心堂嘅企业文化;第三个,就系养生嘅问题,我哋而家“百年健康养生专家”嘅定位,就系从以前开始流传嘅精神,通过我哋呢代人去提炼出嚟嘅。凉茶文化要保留落去,其实系不容乐观嘅,而家有两种形式,一个系快销饮料嘅形式,另一种就系传统凉茶铺。传统凉茶铺,先系真正嘅凉茶,但系呢种古老嘅凉茶文化,能唔能够焕发生机,要睇每个凉茶企业嘅经营。

?

??? 记者手记:一片清心在水碗

??? 广州人离唔开凉茶。冇偈,鬼叫广州水土湿热,喐下就容易上火、湿毒,稍微有啲燥底同感冒迹象,就要嗱嗱声走去街口间凉茶铺整返碗至得。虽然时代已经发展,凉茶唔使下下落街饮,而系衍生出好多新品,冲剂、罐装凉茶饮料等应有尽有。不过,广州人仲迷信另一句说话——— 良药苦口,冲剂又好,凉茶饮料又好,虽然话甜椰椰好入口,但系心里面始终迎住功效肯定唔及按方熬制嘅水碗凉茶。

??? 本地凉茶铺有几大连锁,而其中最有文化沉淀嘅,应该讲系始创于1906年嘅清心堂。听胡先生讲,原来呢个品牌,并唔系一开始就喺广州,而系潮州名中医詹泰来开嘅普通药铺,后来针对岭南人共通症状研制咗几剂药方,大量熬制,供人饮用,慢慢发展成凉茶铺。真正作为纯粹凉茶铺,已经系1950年代詹老先生嚟到广州嘅事。据胡先生所言,清心堂喺成为连锁经营店之前,始终唔系好出彩,甚至停业过好几次。詹老先生去世之后闭业,适逢“文革”,后人都冇心冇胆去经营凉茶铺,又因为咁,好多器具得以保留落嚟,冇经历其他凉茶铺被砸被毁嘅悲剧。但系清心堂20年冇再出现过喺广州,到后人重新开业嘅时候,亦不过小打小闹两三年,见冇咩作为,就又再闭业。

??? 直到受连锁经营模式嘅启发,詹高雄开始第一间清心堂连锁店,清心堂先至揾到佢嘅生命力。咁啱呢个时期,系水碗凉茶铺呢种传统凉茶文化载体嘅井喷期,清心堂可以话系乘风而上,最终发展成凉茶铺“走出去”嘅佼佼者。如果话,王老吉系将凉茶变换成饮料打开全国市场,清心堂就系保存传统凉茶文化嘅特色,逐步将广式凉茶推广出去。水碗凉茶呢种凉茶文化形式,而家已经处于夹缝中,因为年轻人要降火,佢可以有好多选择,凉茶饮料等快销品或者系坠火汤水都可以解决。凉茶铺嘅凉茶始终系苦嘅,后生嘅未必会拣你,因为其他更可口嘅嘢,都可以完全代替你。对于传统凉茶铺嘅传承,胡先生好睇重,佢认为呢个先系真正嘅凉茶文化,良药苦口、低价、方便,承载住祖辈悬壶济世嘅善心。当凉茶成为快销品,佢究竟仲有冇以前嘅传统文化喺里面?胡先生话,有,但系呢个系凉茶文化嘅外延发展,而且,斋做凉茶铺,而家嘅市场系做唔掂嘅,必须要走复合型路线——— 既要有凉茶铺,又要有其他形式嘅嘢迎合市场需求,如果唔去创新,只有死路一条。

??? 而家嘅清心堂,凉茶铺依然系最重要嘅品牌形象,但早就已经唔止有凉茶铺。凉茶冲剂、饮用茶系列、快销连锁店、咖啡连锁店都有所涉猎。从一间断断续续经营,曾经一度消失于世嘅凉茶老铺,到而家嘅健康养生产业,清心堂迈咗好大一步。始终,养生呢样嘢,广州人真系冇佢唔得。只要用心去做养生嘅事业,呢个字号就算再次经历大风浪,都仍然能够屹立不倒。

(来源:南方都市报;采写:南都特约记者冯璐赟;特别鸣谢:ag官方网|官方网站)

[ 打印本页] [ 关闭窗口]
版权所有(C)ag官方网|官方网站,保留所有权利 地址:广州市光复中路199号 邮政编码:510140
联系电话:020-81868993 传真:020-81308473 主办机构:ag官方网|官方网站 邮箱:lzhxh@163.com
 ag国际厅亚洲线路|官网? ?亚游登录器|平台