陈李济:同心济世四百年

点击:1498  添加时间:2014-01-17 15:37:00

?

? ???

陈李济,1600年由李升佐、陈体全始创于广州双门底(现北京路),系中国现存最古老嘅中药老字号,亦系全球最古老嘅仍然运营嘅制药厂。陈李济唔单止系见证中药发展400年历史嘅“活化石”,仲系中国近现代史嘅见证者同参与者。陈李济以务实灵活嘅粤商经营风格着称,其为商之道,可以讲系早期最现代嘅经营制度。今期作者采访到陈李济副总经理叶琼莹女士,一齐了解陈李济嘅历史同现在。

?

?? ?现代股份制雏形

??? 南都:陈李济嘅创始,据闻有段古。

??? 叶琼莹:陈李济系1600年嘅时候由陈体全、李升佐创始嘅。陈公系个商人,李公系个医生,佢哋两个人嘅相识,系好偶然嘅缘分。当时陈公出去收货银,坐船返广州,收到嘅货银落船嘅时候赖低咗喺船上,啱啱好李公就执到呢包货银,当时系年底,佢心谂唔见咗包钱嘅人一定好心急。噉李公就系天字码头度等,等到天黑陈公先至嚟,见佢急急脚,就问佢系咪跌咗包钱,然后还返畀佢。陈公为咗感激李公,想畀酬金,但系李医生话执到人哋嘅嘢还返畀人系理所当然嘅,两个人推嚟推去。后来陈公问起李公做边行,李公就话喺北京路开草药铺,帮人睇下病。后来倾倾下,发现大家都系南海人,陈公就话去药店坐下。咁啱当时有人扭伤脚,李医生就将伤者孭咗去药店帮人敷药。陈公一路观察,发现呢个人唔单止唔贪心,心地仲好善良。于是佢就同李公讲,酬金你唔肯要,就当我投资喺你间药店,大家一齐经营喇。陈李济嘅创始就系噉样,因为系悬壶济世,所以就取陈、李两姓,同心济世,于是就叫做“陈李济”。

??? 南都:两位创始人定立嘅规矩同合作经营方式,有啲类似股份制。

??? 叶琼莹:两位创始人都好超前,考虑得比较长远,就立下咗“本钱各出,利益均沾,同心济世,长发其祥”嘅十六字合约,陈、李两姓轮流坐庄,三年一换。可以讲系最早嘅资本合作形式,股份制嘅雏形。因为我哋系药店,所以无论系边个坐庄,都规定要选出家族中文化素质最高、道德品质最好嘅人嚟执掌,否则另一姓嘅家族有权推翻。另外有一样嘢,就系陈李两公规定两姓可以做世交好友,但系唔可以通婚,以免陈李济成为家族企业,导致内部利益纷争。喺呢一点上睇,当时两位老人家嘅思想确实好超前。

??? 南都:点解呢种形式可以保持三百几年,点样可以保证两家人能够选出平均质素以上嘅执掌人?

??? 叶琼莹:首先系制度本身好,用今日嘅话嚟讲就系监督到位,呢种监督系道义上嘅,喺公私合营之前嘅三百几年,呢种模式可以话相当严格。而陈李济嘅执掌人,我谂系缘于当时最初立下嘅祖训已经成为一种信念,如果你选择冇信念嘅人,另一姓氏嘅人会推翻佢,无形中会成为佢嘅行为规范。学坏三日,学好三年,一种长时间嘅信念,对陈、李两家嘅人已经系入心入肺。另一方面,家族荣誉感约束行为,所以两个家族先至会有一种潜意识,要维护家族嘅信念同品格。

??? 南都:点解陈李济仲有个“杏和堂”嘅商标?

??? 叶琼莹:传说系话,当年同治帝食咗陈李济嘅药,医好咗佢个病,噉佢一高兴就大笔一挥,题咗“杏和堂”块匾送过嚟。杏和堂就系噉嚟嘅。陈李济一路都用住两个商标,但系后来仲系以“陈李济”为主。

?

??? 中药制药“活化石”

??? 南都:陈李济系三大老药厂中最老嘅一个,佢同北京同仁堂有咩差别?

??? 叶琼莹:同仁堂嘅药品一直都比陈李济嘅药贵,因为佢主要系做宫廷用药。但系陈李济嘅药疗效唔比同仁堂差。实质上陈李济嘅创始,系呢两位老先生同心济世嘅谂法,佢系要济困平民百姓。以前双门底陈李济门口有卖凉茶,因为嗰头比较多搬运工同码头工人,加上广州天气特别湿热,陈李济就会煲凉茶出嚟,半买半送。你畀两分钱五分钱,一样收,确确实实冇钱嘅话,佢都会畀你饮。所以,陈李济做生意,赚嘅都系比较微利嘅钱。呢个系佢嘅社会责任感,立意济世,要令老百姓买得起、用得起。所以陈李济药品一直唔系太注重外观,而系注重内在质量,药丸可能冇人哋嘅睇落咁滑溜、咁靓,但保持原汁原味,觉得有疗效就得,老百姓买得起就得。

??? 南都:外观比较朴素,偏于注重质量,都可以讲系陈李济比较务实嘅性格?

??? 叶琼莹:冇错,就系务实,讲实际。以前一路都觉得,有用就得喇,唔使咁靓。

??? 南都:一开头系草药铺,后来发展成主要做药丸嘅中成药厂,呢个系一个好大嘅发展。

??? 叶琼莹:最开头嘅药材铺都唔系单纯嘅药材铺,以前啲中医都系噉嘅,将药材买返嚟,为咗方便病人,就制成药丸。只系最开头嘅时候可能得几个人,到后来发展到一定规模,人就多咗,各类药品嘅剂型同品种都多咗。

??? 南都:呢个发展期有几漫长?有啲乜嘢种类?

??? 叶琼莹:我谂大概都有成百年。我哋呢度有保留一块以前陈李济嘅牌匾,但系得返一半,因为陈李济经过好多次损毁,冇办法知道系几时损坏嘅。上面系当时陈李济嘅药品目录,净系睇药名,我谂到有两百几年,因为其中好多药,后嚟都冇做。从呢块匾,首先可以睇到,当时陈李济主要系做保健养生嘅药品,几乎贯穿咗人一生嘅过程,从孕育胚胎到老年阶段,都有相应嘅保健药品。第二个,当时陈李济嘅药品齐全,有丸剂、丹剂、茶剂、油剂、散剂、酒剂,如果冇一定规模,冇可能做到咁多。第三,可以睇到陈李济喺技术上系不断创新嘅,而且当时亦都受老百姓欢迎。

??? 南都:做药丸有咩特别嘅工序?喺包装上有咩独特之处?

??? 叶琼莹:做药有好几大工序嘅,蒸、炒、炖、磨、搅、晒等等。早期陈李济嘅药以大药丸为主,制作过程需要喺药粉中加蜜、酒、醋、盐,然后在搓匀做成药丸。一开头都系用纸包住药丸,好似朱古力噉两边一扭就算口架喇。但系岭南天气又湿又热,药丸中有其他易挥发、易受潮、易变质嘅成分,陈李济就发明咗蜡壳呢种包装,喺清代系一种包装技术嘅创新。

??? 南都:据闻陈李济用嚟入药嘅陈皮唔系一般嘅陈皮。

??? 叶琼莹:陈李济嘅陈皮比较独特,普通陈皮,一般都系以新会嘅为佳,所以我哋一直都系喺新会采购嘅。新鲜果皮买返嚟,就会放喺煮蜜糖嘅炉灶上方,由于不断噉熏蒸煮蜜时候产生嘅糖蒸汽,就形成咗陈李济陈皮独特嘅性质同性状。开始系偶然嘅,后来发现噉样做嘅陈皮特别好,就特登噉样嚟晾放陈皮喇。而家已经冇再噉样做,因为已经唔符合相关卫生安全生产规定,都系直接采购新会陈皮。

?

? ??做好药,先做好人

??? 南都:后来点解会喺十三行度开分店?

??? 叶琼莹:因为业务发展嘅需要。清代中后期,好多商品都系喺十三行进行贸易。陈李济不断发展,需要进口药材,同时亦需要将自己嘅药品输送出去,所以十三行呢间铺主要系做贸易。

??? 南都:陈李济都可以算系中国近现代史嘅见证者同参与者。

??? 叶琼莹:冇错,陈李济咁多年,经历过好多次损毁,可以讲系一个切实嘅经历者同见证者。陈李济嘅人,亦都系历史嘅参与者,好似李朗如先生,追随孙中山搞革命,后来参加北伐。杨殷系陈李济后人嘅女婿,当时佢系革命者,陈李济系革命联络点。到咗公私合营嘅时候,李朗如系省政协副主席,带头将自己嘅个人股份捐献畀国家,当时亦都系顶住家族压力。基本上,佢一路都将民族大义放喺第一位。公私合营之后,陈、李两家后人,好多都喺外国,继续留低嘅都成为企业职工。心态嘅转变肯定有个过渡期,但我听好多前辈讲,佢哋基本上都系支持嘅。后来1998年,因为北京路老厂房难以适应现代化管理需要,同时北京路市政建设亦需要撤出厂房,陈李济带头参与第一期改造,搬到新厂。每一个时期,陈李济都会根据各个时代嘅发展步伐嚟调整自己嘅脚步,推动社会发展,呢点好难得。

??? 南都:点解陈李济人能够将药厂持续落嚟,生生不息?

??? 叶琼莹:陈李济嘅祖训,“火兼文武调元手,药辨君臣济世心”,意思就系话你要做好药,必须先做好人。呢个理念,到今日我哋嘅企业仲系适用,作为陈李济人,必须要系噉。老百姓到今时今日仍然认可陈李济,系因为陈李济始终将做药同做人连埋一齐,履行社会责任。药系用嚟医病救人,唔能够赚黑心钱。哪怕到今时今日,我哋经营碰到好多困难,仍然坚持地道药材,虽然有成本压力,但系必须要买地道药材嚟做药。双门底间铺头经过多次损毁,能够恢复,系因为陈李济上下一心,大家对陈李济都有特殊感情。好似抗战嗰阵,间铺炸咗,抗战胜利之后,工人马上开始清场,同老板一起重新起。有钱出钱,冇钱出力,冇人讲工资,个个日以继夜。员工同老板、陈李济嘅关系系好亲密嘅共同体,亦都有份民族责任感喺度。

??? 南都:四百几年落嚟,陈李济有乜嘢系冇变过嘅?

??? 叶琼莹:同心济世。同心就系指团队意识,从陈李两公嘅合作,到后期全体上下齐心合力重建厂铺。济世情怀系一直传承嘅,做好药必须要做好人,要有济世嘅心,先能够做出好药。我哋系全国最长寿嘅中药厂,老字号当中呢啲好嘅传统,系我哋需要传承嘅。当然,四百几年传落嚟嘅文化亦都有好根深蒂固嘅部分,佢同时代发展有距离,就好似我哋对包装唔够重视。点样赋予老字号新生命,点样将济世情怀同时代相融合,系我哋今日要思考同探索嘅。

?

??? 记者手记:一阵温醇药香带嚟嘅踏实

??? 你知道北京路194号,曾经并唔系兴旺繁华嘅银座广场,而系一间中国最古老嘅中药厂铺吗?喺广州生存414年嘅制药老字号陈李济,曾经喺呢个旧时叫做“双门底”嘅商业旺地矗立足足398年。想象一下如果时光倒流,当年药铺门前街道,可能仲系而家北京路地面展示玻璃下几朝街道嘅其中一层。

??? 同陈李济副总经理叶姐嘅见面,约喺陈李济中药博物馆。博物馆喺位于广州大道南嘅陈李济厂区里面,行入药厂,隐约闻到阵阵药香。博物馆经过精心打造,一楼还原咗陈李济旧阵时喺双门底前店后厂嘅铺面,古色古香,似乎真系有医生坐堂,学徒执药,病人睇病饮药茶。二楼展示早期陈李济制药嘅工序同器具,仲藏有百几两百年前嘅店铺招牌、药品目录牌匾、过百年嘅独制陈皮。听叶姐介绍嘅时候,暗自感叹咗几次:陈李济真系中药嘅“活化石”!细个时候见阿妈食嘅乌鸡白凤丸,外边有个好似乒乓波噉嘅蜡壳,觉得零舍得意,原来呢种蜡壳,系陈李济19世纪时候嘅发明。呢种包装,改变咗以往用纸包装中药丸容易吸潮同变质,亦都比后来同仁堂用纸筒包药再喺外边过一层蜡要更加方便,密封性更强。

??? 陈李济就系呢种够胆创新,又讲求实际嘅商号。做药品生意嘅祖训“火兼文武调元手,药辨君臣济世心”,陈李济一直认为先要有济世仁心,先至能够做出好药。相对包装,陈李济始终更注重品质,就算粒药丸冇人哋咁滑溜,但一定真材实料唔输蚀。喺咁多药品安全问题陈出不穷嘅今日,400年老字号陈李济,能够畀广州人一种踏实嘅信心,都系因为佢嘅实而不华,呢样嘢系非常难得嘅。

??? 一间药品老字号能够生存超过400年,有啲咩秘密?叶姐以前喺何济公药厂,后来先至调过嚟陈李济,但系佢对陈李济嘅历史可以话系如数家珍,对陈李济嘅文化同感情都有好深嘅认同感。一间南药老字号能够生生不息,除咗始终秉持同心济世,最重要嘅系佢嘅文化生命力,能够凝聚同吸引一代代陈李济人为之而努力。

??? 陈李济,一切都朴实无华,但系自有一股醇香魅力,来自四百年嘅时光隧道。

(来源:南方都市报;采写:南都特约记者冯璐赟;特别鸣谢:ag官方网|官方网站)

[ 打印本页] [ 关闭窗口]
版权所有(C)ag官方网|官方网站,保留所有权利 地址:广州市光复中路199号 邮政编码:510140
联系电话:020-81868993 传真:020-81308473 主办机构:ag官方网|官方网站 邮箱:lzhxh@163.com
 ag国际厅亚洲线路|官网? ?亚游登录器|平台